Mae ymarfer diogel ac effeithiol yn gyfrifoldeb ar y cyd
Mae ymarfer diogel ac effeithiol yn gyfrifoldeb ar y cyd rhwng yr unigolyn cofrestredig, rheoleiddwyr iechyd a gofal, y sefydliad sy’n cyflogi (lle bo hynny’n berthnasol) a’r cyrff proffesiynol, gyda phob un ohonynt yn cydweithio o fewn fframwaith cyfreithiol.
Unigolion cofrestredig
Fel unigolion cofrestredig, eich rôl ydy sicrhau eich bod yn gweithio oddi mewn i derfynau eich gwybodaeth, sgiliau a phrofiad. Drwy ddefnyddio eich crebwyll proffesiynol, mae rhaid i chi:
- fodloni’r holl safonau rheoleiddiol sy’n berthnasol i gwmpas eich ymarfer;
- cymryd rhan weithredol mewn goruchwylio;
- bod â threfniant indemniad proffesiynol ar waith ar gyfer eich ymarfer; ac
- ymgymryd â datblygu proffesiynol parhaus sy’n berthnasol i gwmpas eich ymarfer, gan gymryd rhan mewn awditau o dro i dro yn ôl y gofyn.
Rheoleiddwyr
Mae rheoleiddio yn rhan o’r darlun diogelwch ehangach ac ar ei ben ei hun, nid yw’n gwarantu ymarfer diogel, ac mae hynny’n cynnwys ar y lefelau ymarfer uwch. Gallwch ddod o hyd i ragor o wybodaeth am reoleiddio lefelau ymarfer uwch a’r hyn rydyn ni’n ei wneud i ddiogelu’r cyhoedd.
Cyflogwyr
Rhaid i sefydliadau sy’n cyflogi fod â’r canlynol ar waith:
- trosolwg eglur gan arweinwyr ac atebolrwydd dros y gweithlu;
- dealltwriaeth gyson o lefelau ymarfer uwch (gan gynnwys ar y lefel weithredol);
- polisïau a phrosesau gweithlu i gefnogi lefelau ymarfer uwch, gan gynnwys ar gyfer goruchwylio, dirprwyo ac optimeiddio cwmpas;
- cynllunio cadarn ar gyfer y gweithlu, gan gynnwys cynllunio gwasanaethau a defnyddio’r gweithlu;
- cefnogaeth gyson i’r gweithlu, gan gynnwys addysg, hyfforddiant a goruchwylio er mwyn bodloni gofynion rheoleiddiol;
- disgrifiadau swyddi sy’n mapio i’r pedair colofn ymarfer; a
- cwmpasau ymarfer diffiniedig sy’n cael eu hadolygu’n rheolaidd.
Gallwch ddod o hyd i ragor o wybodaeth i reolwyr a chyflogwyr ar yr Hafan Cyflogwyr.
Cyrff Proffesiynol
Mae cyrff proffesiynol yn darparu arweiniad a chefnogaeth ar gyfer proffesiynau penodol mewn perthynas â chwmpas ymarfer, eiriolaeth a chyngor, ymchwil, a chefnogaeth i dwf proffesiynol a datblygu proffesiynol parhaus.
Gallai aelodaeth o gorff proffesiynol gynnwys trefniadau indemniad proffesiynol, ond mewn rhai achosion, gall fod angen i unigolion cofrestredig wneud trefniadau ychwanegol, yn ddibynnol ar gwmpas eu hymarfer fel unigolyn.
