Cwestiynau cyffredin ac adnoddau Lefelau ymarfer uwch

Cwestiynau Cyffredin Lefelau ymarfer uwch

• Sut ydw i’n gwybod a ydw i’n gweithio ar lefel ymarfer uwch?

  Mae gan bob un o wledydd y Deyrnas Unedig ei set ei hun o adnoddau i ddisgrifio’r gwahanol lefelau ymarfer, sef estynedig/arbenigol, uwch, ymgynghorol, sy’n benodol ar gyfer y wlad honno, gan gynnwys y galluoedd disgwyliedig ar rai o’r lefelau ymarfer. Gallwch weld rhai o’r rhain ar waelod y dudalen hon. Mae’r gwaith yn esblygu ac mae ymdrechion yn parhau ar draws y Deyrnas Unedig i ddarparu eglurder i unigolion cofrestredig, rheolwyr a sefydliadau ynglŷn â’r gwahanol lefelau ymarfer.

  Os nad ydych chi’n siŵr beth yw lefel eich ymarfer, neu pa deitl(au) dylech chi ddefnyddio ar gyfer eich ymarfer, mae’r cyrff proffesiynol yn cynhyrchu adnoddau hefyd i roi arweiniad i aelodau ynglŷn â rhoi tystiolaeth o lefel eu hymarfer.

  Er bod rheoleiddwyr statudol fel yr HCPC yn gwarchod y teitlau dynodedig ar gyfer proffesiynau, dydyn ni ddim yn pennu teitlau ar gyfer gwahanol lefelau ymarfer. Ceir amryw o deitlau swyddi ar draws y lefelau ymarfer uwch, a’r sefydliadau sy’n cyflogi sy’n eu pennu, nid y rheoleiddwyr. Mae’r teitlau swyddi, y tâl, amodau a thelerau yn amrywio rhwng gwahanol sefydliadau.  Gallwch chi wirio llywodraethiant a gofynion lleol i gael canllawiau pellach ynglŷn â pha deitl(au) y gallwch ddefnyddio. 

• Mae’r NMC yn cynnig y dylai fod rheoleiddio ychwanegol ar gyfer nyrsys sy’n gweithio ar y lefel ymarfer uwch. A fydd yr HCPC yn cyflwyno rhywbeth tebyg?

  Mae’n bwysig cofio bod holl unigolion cofrestredig yr HCPC sy’n gweithio ar bob lefel gyrfa, gan gynnwys lefelau uwch, eisoes yn cael eu rheoleiddio’n llawn ac mae rhaid iddynt fodloni holl safonau’r HCPC sy’n berthnasol i gwmpas eu hymarfer. Mae’r HCPC yn gwneud penderfyniadau rheoleiddio annibynnol, ac rydyn ni’n seilio ein penderfyniadau ar ddata a thystiolaeth er mwyn sicrhau ein bod yn gweithredu i ddiogelu’r cyhoedd. Rhaid i’r holl unigolion cofrestredig ymgymryd â gweithgareddau DPP hefyd, a dylai eich DPP adlewyrchu cwmpas eich ymarfer (a all fodd fel ymarferydd uwch).

  Gallwch chi ganfod rhagor o wybodaeth gennym ynglŷn â rheoleiddio a bodloni’r safonau presennol ar lefelau ymarfer uwch, wedi’i hysgrifennu ar y cyd â’r Cyngor Osteopatheg Cyffredinol. 

• Ydy’r pedair colofn ymarfer yn orfodol ar gyfer pob lefel ymarfer uwch?

  Nid yw’r pedair colofn ymarfer yn ofyniad rheoleiddiol, ac ni fydd y lefel rydych chi’n gweithio arni ar draws y pedair colofn yma yn effeithio ar eich cofrestriad. Ar y lefelau uwch ac ymgynghorol, mae disgwyliad yn y gweithlu y bydd ymarferwyr yn dangos eu gallu i weithio’n ymreolus ar draws pob un o’r pedair colofn ymarfer.  Er enghraifft, mae rhan o’r diffiniad o’r lefel ymarfer uwch, ar gyfer AHPs yn gosod y disgwyliad yn y gweithlu bod:

  “Ymarfer Uwch yn y proffesiynau perthynol i iechyd yn golygu gwneud penderfyniadau cymhleth, wedi’u sylfaenu ar ddyfarniad ôl-gofrestru ar lefel meistr neu gyfatebol a gyflawnir gan ymarferydd profiadol ac sy’n ymgorffori pob un o’r pedair colofn ymarfer: ymarfer clinigol, arweinyddiaeth a rheolaeth, addysg, ac ymchwil. Mae’n cael ei ddarparu gan weithwyr proffesiynol iechyd a gofal galluog a phrofiadol sydd â lefel sylweddol o ymreolaeth, crebwyll a chyfrifoldeb yn eu rolau.”

• Rwy’n gweithio mewn practis annibynnol. Sut galla i ddangos fy mod i’n gweithio ar lefel ymarfer uwch?

  Nid oes gan yr HCPC unrhyw reoleiddio na chydnabyddiaeth ychwanegol ar gyfer y gwahanol lefelau ymarfer.

  Beth bynnag fo’r lefel rydych chi’n gweithio arni, rhaid i chi sicrhau eich bod yn bodloni safonau’r HCPC, sy’n cynnwys gweithio oddi mewn i derfynau cwmpas eich ymarfer a sicrhau bod eich DPP a gweithgareddau eraill yn berthnasol er mwyn diwallu anghenion defnyddwyr y gwasanaeth.

  Gallai ein templed myfyrio ynglŷn â diffinio ac egluro cwmpas eich ymarfer fod o gymorth i chi hefyd.

  Os ydych chi’n awyddus i gael rhagor o gyngor ynglŷn â sut i ddangos a derbyn cydnabyddiaeth am lefel eich ymarfer, rydym yn argymell y dylech drafod â’ch corff proffesiynol yn ogystal â’ch fframweithiau cenedlaethol perthnasol.  

• Os ydw i wedi cwblhau gradd feistr er mwyn ymuno â’r Gofrestr, a fydda i eisoes yn gweithio ar lefel uwch pan fydda i’n dechrau ymarfer?

  Na fyddwch. Mae eich cymwysterau cyn-cofrestru a’r profiad y byddwch chi’n ei grynhoi wedi hynny yn helpu i ffurfio cwmpas eich ymarfer. Fel unigolyn cofrestredig sydd newydd gymhwyso, rydych chi’n ymarferydd ymreolus ac wrth i chi ennill profiad, ac mewn rhai achosion, cymwysterau ychwanegol, ar draws pob un o’r colofnau ymarfer, gallech chi symud ymlaen drwy wahanol lefelau.  Mae'n bwysig cofio bod rhaid i chi weithio oddi mewn i derfynau cwmpas eich ymarfer bob amser, o bod y cwmpas hwnnw wedi’i ffurfio gan derfynau eich gwybodaeth, sgiliau a phrofiad.