Cefnogi lefelau ymarfer uwch: myfyrdodau ynglŷn â’m Cymrodoriaeth Glinigol HCPC (2025–26)

Dr Stephanie Tempest PhD, therapydd galwedigaethol ac unigolyn cofrestredig gyda’r HCPC.

Stephanie Tempest ydw i, therapydd galwedigaethol ers 1997 ac unigolyn cofrestredig gyda’r HCPC ers ei sefydlu yn 2002 i gymryd lle’r Cyngor ar gyfer Proffesiynau Ategol i Feddygaeth Ers dechrau'r haf y llynedd, rwyf wedi cael y fraint o weithio fel Cymrawd Clinigol yn yr HCPC ar sail rhan-amser. Mae wedi bod yn brofiad dysgu gwych i mi ac hefyd yn gyfle i ddod â’m gwybodaeth a’m profiadau o weithio ar draws sectorau i’r tîm, gan gynnwys gwaith mewn ymarfer clinigol, addysg, ymchwil ac arweinyddiaeth strategol genedlaethol.

Canolbwynt fy rôl ydy llywio a darparu darn pwysig o waith i gefnogi unigolion cofrestredig a rheolwyr yn eu dealltwriaeth o ffyrdd o fodloni safonau rheoleiddiol ar lefelau ymarfer uwch. O’r cychwyn, roeddwn i’n teimlo cyffro mawr o gael y cyfle hwn. Wedi treulio’r ddegawd ddiwethaf yn arbenigo mewn dysgu a datblygu ar gyfer y gweithlu, roedd y prosiect hwn yn cynnig yr union fath o her a thwf yn fy ngyrfa yr oeddwn i’n chwilio amdanynt.

Nodau ein prosiect

Roedd gan y prosiect dri nod creiddiol:

Cafodd y prosiect ei gomisiynu gan NHS England, gyda golwg ar y Deyrnas Unedig gyfan a phwyslais penodol ar gymhwyso safonau rheoleiddiol ar lefelau ymarfer uwch. Mae’r safonau sy’n ymwneud â chwmpas ymarfer, goruchwylio a dirprwyo wedi bod wrth graidd y gwaith hwn. Mae’r meysydd hyn yn hanfodol er mwyn galluogi ymarferwyr i weithio’n ddiogel, yn effeithiol ac mewn ffyrdd sy’n adlewyrchu eu harbenigedd.

Prosiect wedi’i lywio gan gydweithio a rhannu gwybodaeth

Er mwyn cyflawni’r nodau hyn, roedd angen ymgysylltu'n eang, gwrando’n rhagweithiol ac ymrwymiad i gydweithio ar draws y Deyrnas Unedig, proffesiynau a sectorau.

Gan weithio o fewn y tîm Polisi a Safonau, rwyf wedi bod yn rhan o grŵp prosiect ehangach, gan gydweithio nid yn unig â thimau gwahanol yn fewnol, ond â phartneriaid allanol hefyd. Mae'r cydweithio traws-reoleiddiol hwn wedi cynnwys gweithio’n agos gyda'r Cyngor Osteopatheg Cyffredinol (GOsC), gan greu amgylchedd dysgu ffrwythlon a sicrhau bod y gwaith yn elwa o safbwyntiau proffesiynol amrywiol.

Cynnal ymarfer diogel ac effeithiol 

Un o’r agweddau a roddodd fwyaf o foddhad yn y rôl oedd y cyfle i ganolbwyntio’n fanwl ar y ffyrdd y mae safonau rheoleiddiol eisoes yn cefnogi pobl sy’n gweithio ar lefelau ymarfer uwch neu’n gweithio tuag atynt, a’r rheolwyr sy’n eu cefnogi hwythau. Mae’r rhan hon o’r gweithlu yn dod â chyfoeth o wybodaeth, sgiliau a phrofiadau ac rwyf wedi gwerthfawrogi cael canolbwyntio ein gwaith ar ffyrdd o sicrhau bod y fframwaith rheoleiddiol presennol yn rhoi cefnogaeth briodol iddynt er mwyn cyfrannu at ofal o ansawdd uchel, sy’n canolbwyntio ar yr unigolyn.

Wrth reswm, un rhan yn unig o’r dirwedd broffesiynol ehangach ydy rheoleiddio. Mae ymarfer diogel ac effeithiol yn dibynnu ar gydweithio ar draws y system, gydag unigolion cofrestredig, rheolwyr, cyrff proffesiynol, undebau a rheoleiddwyr oll yn cyflawni rolau hanfodol. Wrth i ni ystyried y cwestiynau cyfoes ynglŷn â lefelau ymarfer uwch, roedd yn hollbwysig ein bod yn gweithio ar y cyd ac yn cydnabod y gwaith sylweddol sydd eisoes ar y gweill ar draws y sector.

Gwrando, dysgu ac ymgysylltu ag amrywiaeth eang o bobl

Er mwyn creu darlun ystyrlon, fe gasglon ni fewnwelediadau a data gan filoedd o randdeiliaid allweddol. Gwnaethon ni gynllunio amryw o ffyrdd gwahanol i bobl allu cysylltu â ni, gan sicrhau bod y broses yn hygyrch, yn amrywiol ac yn gynrychioladol.

Gwnes i fy hun arwain 37 o sgyrsiau gwrando gyda rhychwant eang o grwpiau, gan gynnwys cyrff proffesiynol, undebau, arweinwyr cenedlaethol a rhanbarthol o bob un o bedair cenedl y Deyrnas Unedig, academyddion sy’n darparu addysg ôl-raddedig ac ymchwil, ac unigolion cofrestredig sy’n gweithio mewn sectorau amrywiol. Rhoddodd y sgyrsiau hyn olwg werthfawr, feintiol i ni ar yr heriau a’r cyfleoedd ar lefelau ymarfer uwch.

Wrth i ymwybyddiaeth o’r prosiect gynyddu, cawsom wahoddiadau, a dderbyniwyd yn ddiolchgar, i gyflwyno mewn 10 o gyfarfodydd amlbroffesiwn, cynadleddau a gweminarau a gynhaliwyd gan gydweithwyr ar draws y system. Roedd y diddordeb allanol hwn o gymorth i gadarnhau perthnasedd a phwysigrwydd y gwaith.

Cyfres lwyddiannus o weminarau

Dangosodd ein cyfres ein hunan o weminarau, a ddarparwyd rhwng mis Medi a mis Tachwedd 2025, faint o ymgysylltu mae’r gweithlu’n ei wneud â’r pynciau hyn. Cofrestrodd dros 5,000 o bobl ac fe fynychodd bron i 2,500, sy’n raddfa drosi ardderchog.

O blith y rhai a fynychodd:

• roedd 1,535 yn unigolion cofrestredig oedd yn gweithio tuag at neu’n ymarfer eisoes ar lefelau uwch; ac
• roedd 884 yn rheolwyr, gan gynnwys cydweithwyr amlbroffesiwn fel nyrsys a meddygon. 

Roedd hwyluso gweminarau ar y raddfa hon yn gyffrous ac, mae’n rhaid cyfaddef, ychydig yn arswydus. Er bod gen i brofiad helaeth mewn addysgu a chyflwyno, dyma’r cynulleidfaoedd ar-lein mwyaf i mi ryngweithio â nhw erioed. Roedd yr adborth yn eithriadol o gadarnhaol, a dyma un o’r uchafbwyntiau sy’n sefyll allan i mi o hyd o’r prosiect.

Yn ystod sesiynau’r gweminarau, buon ni’n annog cyfranogiad weithredol drwy gwestiynau byw, polau a dulliau o roi ymateb. Rydyn ni’n ddiolchgar hefyd i’r 171 o bobl a gwblhaodd y gwerthusiad ar ôl gweminar, gan gynnig adborth manwl a fu’n gymorth wrth ffurfio cam nesaf y gwaith.

Datblygu adnoddau amlgyfrwng sy’n ymateb i anghenion yn y byd go iawn

Cafodd yr holl ddata a mewnwelediadau a gasglwyd fel rhan o’n gweithgareddau ymgysylltu eu dadansoddi gan dîm y prosiect ac fe amlygon nhw nifer o feysydd lle byddai rhagor o eglurder a chefnogaeth yn werthfawr i unigolion cofrestredig sy’n gweithio ar lefelau ymarfer uwch a’u rheolwyr.

Cyfrannodd y themâu allweddol hyn yn uniongyrchol at ddatblygiad set amrywiol o adnoddau o ansawdd uchel sy’n diwallu anghenion a dewisiadau dysgu gwahanol. Ymhlith yr adnoddau hyn, y ceir dolenni atynt ar ddiwedd y blog hwn, mae:

• adnoddau pwrpasol newydd y gellir eu lawrlwytho, megis Diweddariad ar y Cyd ynglŷn â rheoleiddio lefelau ymarfer uwch a thempled myfyrio i helpu i ddiffinio ac egluro cwmpas ymarfer (y ddau mewn cydweithrediad â’r GOsC);
• cynnwys gwe newydd a luniwyd yn benodol er mwyn cefnogi dealltwriaeth o lefelau ymarfer uwch;
• gwell cynnwys gwe er mwyn gwella eglurder a sicrhau perthnasedd i ymarfer proffesiynol cyfredol;
• mynediad at recordiadau o weminarau, gan gynnwys darn fideo byr wedi’i recordio o’r newydd, a phecyn o sleidiau i gefnogi gweithgareddau DPP; ac
• arwyddbyst at ganllawiau ac adnoddau pellach, gan gynnwys enghreifftiau gan gyrff proffesiynol a sefydliadau eraill. 

Rwy’n falch o’r rhychwant ac ansawdd y deunyddiau rydyn ni wedi’u datblygu. Gwnaethon ni ymdrech fwriadol i sicrhau eu bod yn hygyrch, yn ymarferol ac ar gael mewn fformatau amrywiol, felly mae rhywbeth i bawb.

Rwy’n falch hefyd o’r ffordd y cafodd yr adnoddau hyn eu datblygu. Buon nhw trwy brosesau adolygu cadarn oedd wedi’u cynllunio â’r bwriad o sicrhau ansawdd a chywirdeb, ac fe wnaethon nhw elwa o arbenigedd nifer o gydweithwyr ar draws y system. Roedd gan gyrff proffesiynol, academyddion, arweinwyr strategol, unigolion cofrestredig, rheolwyr a phartneriaid yn y dirwedd gofal iechyd a rheoleiddio ehangach oll rôl yn llunio’r cynnwys hwn.

Fy ngobeithion ar gyfer yr adnoddau

Rwy’n eich annog i bori drwy’r gyfres lawn o allbynnau ac ystyried sut gallan nhw gefnogi eich ymarfer chi, eich arweinyddiaeth neu’ch gwaith strategol. Ar wefan yr HCPC nawr, fe welwch chi gyfres gynhwysfawr o adnoddau a phecynnau amlgyfrwng sydd wedi’u cynllunio â’r bwriad o gryfhau dealltwriaeth o safonau rheoleiddiol ar lefelau ymarfer uwch a’r ffordd y cânt eu cymhwyso.

Mae’r deunyddiau hyn wedi’u dylanwadu’n uniongyrchol gan leisiau unigolion cofrestredig, rheolwyr, cyrff proffesiynol ac arweinwyr ar draws y system. P’un ai ydych chi’n datblygu eich rôl eich hun, yn cefnogi pobl eraill neu’n cynllunio gwasanaethau, rwy’n gobeithio y byddwch chi’n canfod cynnwys sy’n rhoi gwybodaeth, yn eich cefnogi ac yn ysbrydoli eich camau nesaf.

Edrych ymlaen

Mae’r gymrodoriaeth hon wedi cynnig DPP arwyddocaol i mi, ac wedi rhoi mewnwelediadau gwerthfawr a’r cyfle i gyfrannu at waith sy’n cefnogi ymarferwyr ar lefelau ymarfer uwch a rheolwyr amlbroffesiwn. Mae wedi atgyfnerthu fy marn bod symud y gweithlu yn ei flaen yn rhywbeth sy’n galw am gydweithio at yr un diben, ac ymrwymiad cyson i ddatblygu proffesiynol a rhagoriaeth.

Rwy’n falch o fod wedi chwarae rhan yn y prosiect hwn ac yn ddiolchgar am y cyfle i weithio ochr yn ochr â chydweithwyr sy’n rhoi’r pwys mwyaf ar wella ein cyd-ddealltwriaeth o’r modd y gellir cymhwyso’r safonau presennol i alluogi modelau ymarfer esblygol. Wrth i lefelau ymarfer uwch barhau i aeddfedu ar draws maes iechyd a gofal, rwy’n gobeithio y bydd canlyniadau cydweithredol y prosiect hwn yn helpu i gryfhau’r sylfeini ar gyfer ymarfer diogel, effeithiol a chydweithredol.

Myfyrdodau personol

Wrth i mi ysgrifennu’r blog hwn, mae fy gwaith ar y prosiect hwn yn dod i ben. Mae toreth o bethau i mi fyfyrio yn eu cylch, rhai mewnwelediadau sydd eisoes yn teimlo’n eglur, a rhai eraill fydd yn cymryd amser a gofod i’w prosesu’n llawn. Mae’r gwaith hwn wedi peri i mi werthfawrogi’n fwy fyth pa mor hanfodol ydy hi i bob rhan o’r system weithio gyda’n gilydd i sicrhau ymarfer diogel ac effeithiol, yn enwedig mewn meysydd lle mae dealltwriaeth yn parhau i ddatblygu a rolau’n parhau i ehangu.

Rwy’n gobeithio y bydd yr adnoddau rydyn ni wedi’u datblygu yn cyfrannu at sgyrsiau manwl ac eang fydd wedi’u seilio ar wybodaeth. Yn bwysicaf oll, rwy’n gobeithio y byddan nhw’n helpu i gadw ein ffocws ni i gyd ar yr hyn sydd bwysicaf - darparu gwasanaethau o’r safon uchaf i’r bobl a’r cymunedau rydyn ni’n eu gwasanaethu ar draws pob lleoliad a sector.