Hanes unigolyn cofrestredig sy’n cysylltu cwmpas ymarfer, DPP, goruchwylio a dirprwyo
Mae Ola yn therapydd iaith a lleferydd sy’n gweithio mewn ysgol i bobl ifanc ag anghenion addysgol arbennig yng Ngogledd Iwerddon. Mae’n gweithio ar draws y pedair colofn ymarfer mewn ffordd sy’n berthnasol i’w rôl, gan ddefnyddio Fframwaith Datblygu Proffesiynol y Coleg Brenhinol Therapyddion Iaith a Lleferydd (RCSLT) i’w helpu i ganfod gweithgareddau DPP sy’n gysylltiedig ag ymarfer proffesiynol, hwyluso dysgu, arweinyddiaeth a rheolaeth, a thystiolaeth, ymchwil ac arloesi.
Agwedd
Bob mis wrth gael ei oruchwylio, mae Ola’n trafod sut i alinio ei weithgareddau DPP er mwyn diwallu anghenion defnyddiwr y gwasanaeth gyda’i reolwr llinell. Gyda’i gilydd, maen nhw’n ystyried anghenion defnyddwyr y gwasanaeth a’r ffyrdd y mae cwmpas ei ymarfer yn parhau i esblygu er mwyn diwallu anghenion cymhleth y bobl y mae’n eu gwasanaethu. Maen nhw’n cynllunio ei weithgareddau DPP o amgylch yr elfennau hyn.
Mae Ola’n cynnal disgrifiad cyfoes o gwmpas ei ymarfer, wedi’i gydosod â’r pedair colofn ymarfer. Yn ei sesiynau goruchwylio cymheiriaid chwarterol, mae Ola a’i gydweithwyr hefyd yn treulio amser yn myfyrio ynglŷn â’u twf gyrfaol ehangach er mwyn ystyried cyfleoedd ar gyfer y dyfodol.
Pan fydd ganddo gwestiynau am gwmpas ymarfer ei broffesiwn, mae’n cysylltu â’r Tîm Ymgynghorol yn ei gorff proffesiynol, yr RCSLT.
Mae Ola’n gweithio hefyd gyda thîm o gynorthwywyr therapi iaith a lleferydd a chynorthwywyr addysgu profiadol, ac mae’n goruchwylio rhai o’r rhain. Maen nhw’n ymgymryd â gweithgareddau a ddirprwyir ac yn gwybod sut i gael cefnogaeth pan fydd angen. Mae Ola’n deall nad oes rhaid iddo fod yn yr un proffesiwn â’r rhai y mae’n eu goruchwylio, ond mae’n gwybod hefyd pryd i geisio cyngor ychwanegol os bydd mater yn codi sydd y tu hwnt i derfynau ei wybodaeth a’i sgiliau.
